இணையதளம் மூலம் அறிமுகம் ஆன பெண்ணை சந்திக்கச்சென்ற இந்திய மாணவர் கொலை..!


ஆஸ்திரேலியாவில் இணைய தளம் மூலமாக அறிமுகம் ஆன பெண்ணை சந்திக்கச்சென்ற இந்திய மாணவர் கொலை செய்யப்பட்டுள்ளார்.

ஆஸ்திரேலியாவின் மெல்போன் நகருக்கு அருகே வசித்து வந்தவர் மவுலின் ரதோட் (வயது 25). இந்திய மாணவரான இவர் கடந்த 4 ஆண்டுகளுக்கு முன் ஆஸ்திரேலியா சென்று, அங்குள்ள கல்லூரி ஒன்றில் கணக்கியல் துறையில் பயின்று வந்தார்.

இவருக்கும், மேற்கு மெல்போனின் புறநகர் பகுதியான சன்பரியில் வசித்து வரும் 19 வயது இளம்பெண் ஒருவருக்கும் வலைத்தளம் மூலம் பழக்கம் ஏற்பட்டது. தனியாக வசித்து வரும் அந்த இளம்பெண்ணை பார்ப்பதற்காக மவுலின் ரதோட் கடந்த 23–ந் தேதி அந்த பெண்ணின் வீட்டுக்கு சென்றார்.

பின்னர் அங்கே படுகாயமடைந்து கிடந்த மவுலின் ரதோடை சிலர் மீட்டு ஆம்புலன்ஸ் மூலம் உள்ளூரில் உள்ள மருத்துவமனையில் அனுமதித்தனர். ஆனால் சிகிச்சை பலனின்றி நேற்று இரவு மவுலின் ரதோட் உயிரிழந்தார்.

இது தொடர்பாக அந்த இளம்பெண்ணை போலீசார் கைது செய்து மெல்போன் மாஜிஸ்திரேட்டு கோர்ட்டில் ஆஜர்படுத்தினர். அவரை நீதிமன்ற காவலில் சிறையில் அடைக்க நீதிபதி உத்தரவிட்டார். அவர் மீது கொலை வழக்கு பதிவு செய்யப்பட்டு உள்ளது. இந்த கொலைக்கான காரணம் குறித்து தீவிர விசாரணை நடந்து வருகிறது.-Source: dailythanthi

* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!