தூத்துக்குடி மாவட்டம் கோவில்பட்டியை சேர்ந்தவர் சீனிவாசன். இவரது மகன் ராமகிருஷ்ணன் (வயது 25).
இவர் சென்னை நெசப்பாக்கத்தில் நண்பர் ஒருவருடன் அறை எடுத்து தங்கி சினிமா துறையில் உதவி இயக்குனராக வேலை பார்த்து வந்தார். ராம கிருஷ்ணன் தற்போது பிரபல நடன இயக்குனர் பிருந்தா இயக்கி வரும் ‘தக்ஸ்’ படத்தில் பணிபுரிந்து வந்தார்.
விரைவில் வெளிவர இருக்கும் இந்த படத்தின் பணிகள் கடந்த சில நாட்களாக சாலிகிராமத்தில் உள்ள ஸ்டுடியோவில் நடந்து வருகிறது. இந்த நிலையில், நேற்று இரவு ராமகிருஷ்ணன் பணியில் இருந்த போது திடீரென மயங்கி கீழே விழுந்தார்.
இதனால் அதிர்ச்சியடைந்த உடன் இருந்தவர்கள் ராம கிருஷ்ணனை மீட்டு கீழ்ப்பாக்கம் அரசு மருத்துவமனைக்கு கொண்டு சென்றனர். அவரை பரிசோதித்த மருத்துவர்கள் ஏற்கனவே ராமகிருஷ்ணன் இறந்து விட்டதாக தெரிவித்தனர்.
ராமகிருஷ்ணன் எப்படி இறந்தார் என்பது மர்மமாக உள்ளது. இதுகுறித்து விருகம்பாக்கம் போலீசார் வழக்குப்பதிவு செய்து விசாரணை நடத்தி வருகின்றனர். இவரது மறைவு திரையுலகினரை அதிர்ச்சியில் ஆழ்த்தியுள்ளது.-News & image Credit: maalaimalar * இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
