‘வெண்ணிலா கபடி குழு’ பட நடிகர் ஹரி வைரவனின் உடல்நிலை கவலைக்கிடமாக உள்ளதாக அவரது மனைவி கவிதா யூடிப் சேனல் ஒன்றுக்கு பேட்டியளித்துள்ளார்.
கடந்த 2009 ஆம் ஆண்டு சுசீந்திரன் இயக்கத்தில் வெளியான படம் ‘வெண்ணிலா கபடி குழு’. விஷ்ணு விஷால் நடிப்பில் எதார்த்தமான திரைக்கதையால் ரிலீசான இந்தப்படம் ரசிகர்கள் மத்தியில் அமோக வரவேற்பினை பெற்றது. இந்நிலையில் இந்தப்படத்தில் நடித்த நடிகரின் உடல்நிலை கவலைக்கிடமாக உள்ளதாக தகவல்கள் வெளியாகியுள்ளன.
விஷ்ணு விஷால் ஹீரோவாக அறிமுகமான ‘வெண்ணிலா கபடி குழு’ படத்தில் அப்புகுட்டி, பரோட்டா முரளி, விஜய் சேதுபதி, சரண்யா மோகன், சூரி, ஹரி வைரவன் உட்பட பல நடிகர்கள் நடித்திருந்தனர். இந்தப்படத்தில் நடித்த ஹரி வைரவன் குள்ளநரி கூட்டம், நான் மகான் அல்ல படங்களில் நடித்துள்ளார்.
இந்நிலையில் இவரின் உடல்நிலை தற்போது கவலைக்கிடமாக உள்ளதாக தகவல்கள் வெளியாகியுள்ளன. சர்க்கரை வியாதி, இதய நோய், இரண்டு கிட்னிகளும் செயலிழப்பு என உடல் முழுவதும் பல்வேறு வியாதிகளால் பாதிக்கப்பட்டு இன்று நடக்க கூட முடியாமல் மனைவியின் துணையுடன் ஒவ்வொரு நாளையும் கழித்து வருகிறார்.
ஹரிவைரவனின் உடல்நிலை நாளுக்கு நாள் மோசமடைந்து வருவதாக அவரது மனைவி கவிதா கண்ணீர் மல்க யூடிப் சேனல் ஒன்றுக்கு அளித்த பேட்டி ஒன்றில் கூறியுள்ளார். மருத்துவர்கள் ஆறு மாதம் தான் உயிரோடு இருப்பார் என கை விரித்து விட்டதாகவும், அவர் உயிருடன் இருக்கும் வரை பார்த்து கொள்ள தயாராக இருப்பதாகவும் அவரது மனைவி தெரிவித்துள்ளார்.
ஆனால் ஹரி வைரவன் யாருக்கும் கஷ்டம் கொடுக்கக்கூடாது எனக்கருதி தன்னை கருணை கொலை செய்ய சொல்லி கேட்டதாகவும் அவரது மனைவி கவிதா கண்ணீர் மல்க தெரிவித்துள்ளார். ‘வெண்ணிலா கபடி குழு’ நடிகரின் இந்த பரிதாப நிலையை கேட்டு ரசிகர்கள் அதிர்ச்சியடைந்துள்ளனர். அவர் விரைவில் மீண்டு வர வேண்டும் என்றும் கமெண்ட் செய்து வருகின்றனர்.-News & image Credit: tamil.samayam * இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
