தமிழ் சினிமாவில் தன் நகைச்சுவையின் மூலம் ரசிகர்களின் மனதில் தனி இடம் பிடித்திருப்பவர் நடிகர் சூரி. ஆனால் அந்த இடம் அவருக்கு அவ்வளவு எளிதில் கிடைத்துவிடவில்லை.
கிட்டத்தட்ட பத்து ஆண்டுகளுக்கு மேலாக துணை நடிகராக இருந்து, வாய்ப்புக்காக பல கஷ்டங்களை அனுபவித்து வந்தார் சூரி.
பல படங்களில் ஒரு ஓரமாக இருந்து வந்த சூரி இன்று தேசிய விருது இயக்குனரான வெற்றிமாறனின் விடுதலை படத்தில் ஹீரோவாக நடித்து வருகின்றார். இதுவே அவர் உழைப்பிற்கு கிடைத்த ஒரு வெற்றி எனலாம்.
வாய்ப்பிற்காக காத்திருந்த சூரிக்கு வெண்ணிலா கபடி குழு திரைப்படம் பெரும் திருப்புமுனையை ஏற்படுத்தியது. அதன் பிறகு அவர் வாழ்க்கையில் ஏறுமுகம் தான். மளமளவென பல படங்களில் நடித்து தன் நகைச்சுவை திறனால் ரசிகர்கள் மனதில் இடம் பிடித்து முன்னணி நகைச்சுவை நடிகராக வலம் வருகின்றார் சூரி.
தன் நகைச்சுவையால் மக்கள் மனதில் இடம்பிடித்த சூரி தற்போது தன் நற்செயலால் மக்கள் மனதில் நிரந்தர இடம் பிடித்துள்ளார். மதுரை ராஜாஜி மருத்துவமனை வளாகத்தில் நடிகர் சூரி திறந்துள்ள உணவகம் தான் தற்போது மதுரை மக்களிடையே பிரபலமாக பேசப்பட்டு வருகின்றது.
மிக குறைந்த விலையில் தரமான உணவுகளை வழங்கி வரும் சூரியின் அம்மன் உணவகம் மக்களின் பாராட்டை பெற்று வருகின்றது. மேலும் ஏழை எளிய மக்களுக்கு தரமான உணவுகளை மிகக்குறைவான விலையில் தரும் நோக்கத்திலேயே சூரி உணவகத்தை துவங்கியுள்ளார்.
30 ரூபாய் இருந்தால் போதும் வயிறார சாப்பிடலாம், சூரியின் இந்த மனசு வேறு யாருக்கும் வராது என மதுரை மக்கள் மனதார பாராட்டி வருகின்றனர். லாபத்திற்காக இந்த தொழிலை செய்யாமல் மக்களின் பசியை போக்குவதற்காக சூரி துவங்கியுள்ள இந்த அம்மன் உணவகத்தால் அனைவரும் சூரியை பாராட்டி வருவது குறிப்பிடத்தக்கது.-News & image Credit: tamil.samayam * இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
