தமிழ் திரையுலகில் சூப்பர் ஸ்டார் என்ற பட்டத்தைச் சுமந்து நிற்கும் ரஜினிகாந்த் இன்று தனது 70 ஆவது பிறந்தநாளைக் கொண்டாடினார்.
ரஜினிகாந்த் பிறந்தநாளை முன்னிட்டு, அவரது ரசிகர்கள் இன்று கோயிலில் பூசைகள் செய்தும், பல்வேறு தரப்பினருக்கு நலத்திட்ட உதவிகள் வழங்கியும் கொண்டாட்டங்களை முன்னெடுத்தனர்.
இந்த கொண்டாட்டங்கள் ஆண்டுதோறும் நடக்க, வழக்கம்போல் இந்த முறையும் ரஜினி தலைமறைவாகினார். இந்த முறை இமயமலைக்குச் செல்லவில்லை. பதிலாகப் பெங்களூரில் உள்ளார் என்ற தகவல் வெளியாகி உள்ளது.
இதற்கிடையில் ரஜினி சமீப நாட்களாக அரசியல் கணிப்போடவே அனைத்து விஷயங்களையும் செய்து வருகிறார். அதன் தொடர்ச்சியாக இப்போது ரஜினியின் மக்கள் மன்றம் சார்பாக அம்மா உணவகத்திற்குப் போட்டியாக உழைப்பாளி உணவகம் என்ற உணவகத்தைத் திறந்துள்ளனர்.
ரஜினி பிறந்தநாளை முன்னிட்டு, இந்த உணவகம் திறக்கப்பட்டது. இந்த உணவகத்தில் அளவு சாப்பாடு ரூ. 10க்கும், முழு சாப்பாடு ரூ. 30க்கும் வழங்கப்படுகிறது. முதற்கட்டமாக இந்த உணவகம் சென்னை மணப்பாக்கத்தில் திறக்கப்பட்டுள்ளது.
மக்கள் அளிக்கும் ஆதரவின் அடிப்படையில், மாநிலம் முழுவதும் இந்த உணவகம் திறக்கப்படும் என அறிவிக்கப்பட்டுள்ளது. இது தொடர்பாக ரஜினி மக்கள் மன்றம் வெளியிட்டுள்ள துண்டறிக்கையில், அம்மா உணவகத்திற்கு எதிராகத் திறக்கப்படுகிறது என்பது குறிப்பிடப்பட்டுள்ளது.
ரஜினி அரசியலில் முன்னாள் முதல்வர்கள் கருணாநிதி, ஜெயலலிதா வகித்த இடத்தை பெற வேண்டும் என்ற நோக்கில் நுழைகிறார். இந்த சூழலில் ஜெயலலிதா முன்னெடுத்த மலிவு விலை உணவகம் திட்டத்தை ரஜினி தனது மக்கள் மன்றத்தை வைத்து கையில் எடுத்துள்ளார்.
விரைவில் ரஜினி மக்கள் மன்றம் சார்பாக பல்வேறு திட்டங்கள் அறிமுகப்படுத்தப்படும் எனத் தகவல்கள் தெரிவிக்கின்றன. இந்த உணவகம் செய்திக்கு இடையில் இன்று தமிழ்நாட்டில் பல்வேறு இடங்களில் பெரிய வெங்காயத்தை ரஜினி மக்கள் மன்றத்தினர் மக்களுக்கு அன்பளிப்பாக வழங்கினர்.-Source: samayam
* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
